Friday, December 21, 2012

ಸುಲೋಚನ...


  Week: 12



ಈ ಭೂತ ಕನ್ನಡಿ ಇದೆಯಲ್ಲ ಇದಕ್ಕೂ ನನಗೂ ನಂಟು ಈವತ್ತಿನದಲ್ಲ. 

ಏಕೆಂದರೆ ಈವತ್ತು ನನ್ನ ಹೊಟ್ಟೆ ತುಂಬಿಸುತ್ತಿರುವ ಕ್ಯಾಮರಾ ಮತ್ತು ಅದರ ಮೂಲಕ ಜಗತ್ತನ್ನು ’ಸರಿಯಾಗಿ’ ನೋಡಲು ನಾನು ಧರಿಸುವ ಕನ್ನಡಕ ಎರಡಕ್ಕೂ ಮೂಲ ಆಧಾರ ’ಭೂತ ಕನ್ನಡಿ’ ಅಥವ ಇನ್ನೂ ಸುಲಭ ಅರ್ಥದಲ್ಲಿ ಮಸೂರ ಅಥವಾ ಲೆನ್ಸ್!

ನನ್ನ ಹಳ್ಳಿಯ ಹಣ್ಣು ಹಣ್ಣು ಮುದುಕರು ಮೋದಿ ಡಾಕ್ಟರ್ ಅವರ ಕಣ್ಣು ಚಿಕಿತ್ಸಾ ಶಿಬಿರಗಳಲ್ಲಿ ಮುಫತ್ತಾಗಿ ಕಣ್ಣಿನ ಪೊರೆ ಶಸ್ತ್ರ ಚಿಕಿತ್ಸೆ ಮಾಡಿಸಿಕೊಂಡು ಬಂದು, ಮೊದಲು ಕೆಲವು ದಿನ ಕಪ್ಪು ಕನ್ನಡಕ ಹಾಕಿಕೊಂಡು ಜಗಲಿಯಲಿ ಕೂತು ಎಲೆ ಅಡಿಕೆ ಮೆಲ್ಲುತ್ತಿದ್ದರು. ಆ ನಂತರದ ದಿನಗಳಲ್ಲಿ ಆ ಕಪ್ಪು ಕನ್ನಡಕದ ಜಾಗದಲ್ಲಿ ದಪ್ಪಗಿನ ಕನ್ನಡಕವೊಂದು ಬಂದು ಕೂರುತಿತ್ತು. ಆ ದಪ್ಪಗಿನ ಮಸೂರದ ಹಿಂದಿನ ಅವರ ಕಣ್ಣುಗಳು ಇಷ್ಟಗಲ ಕಾಣುತ್ತಿದ್ದವು. ಆ ನಂತರ ಅವರ ಪತಿನಿಯರನ್ನು ನೋಡಿ ಬಹುಶಃ ನಿನಗೂ ವಯಸಾಯಿತಲ್ಲೇ ರಂಗಮ್ಮ ಎಂದು ಮನಸ್ಸಿನಲ್ಲೇ ಹೇಳಿಕೊಳ್ಳುತ್ತಿದ್ದರೇನೋ?

ನಮ್ಮ ಅಜ್ಜಿ ಕನ್ನಡವನ್ನು ’ಸುಲೋಚನ’ ಎಂದೇ ಕರೆಯುತ್ತಿದ್ದರು. ಅಜ್ಜಿ ತನ್ನ ಟ್ರಂಕಿಗೆ ಯಮ ಭಾರದ ಬೀಗ ಜಡೆಯುತ್ತಿದ್ದರು. ಅದರ ಬೀಗದ ಕೈಗಳನ್ನು ತಮ್ಮ ಕುತ್ತಿಗೆ ದಾರದಲ್ಲಿ ಜತನ ಮಾಡುತ್ತಿದ್ದರು. ಆ ಬೀಗಗಳನ್ನು ಆಕೆ ಜೋಪಾನ ಮಾಡುತ್ತಿದ್ದ ರೀತಿಗೂ ಅವಳ ಕನ್ನಡಕವನ್ನು ಕಾಪಾಡಿಕೊಳ್ಳುತ್ತಿದ್ದ ರೀತಿಗೂ ಅಂತಹ ವ್ಯತ್ಯಾಸವೇನೂ ಇರಲಿಲ್ಲ. ಪದೇ ಪದೇ ತಮ್ಮ ಹಾಸಿಗೆ ಪಕ್ಕ ಇಟ್ಟಿರುತ್ತಿದ್ದ ಕನ್ನಡಕದ ಡಬ್ಬವನ್ನು ಮುಟ್ಟಿ ನೋಡಿಕೊಳ್ಳುವುದು ಮತ್ತು ತನ್ನ ಕುತ್ತಿಗೆಯ ಬೀಗದ ಗೊಂಚಲನ್ನು ಸವರಿಕೊಳ್ಳುವುದು ಆಕೆಯ ಕ್ಷಣ ಕ್ಷಣದ ಕೆಲಸ.

ಕನ್ನಡಕ ಒಡೆದರೆ ಅದನ್ನು ರಿಪೇರಿಯನ್ನು ಯಾರೂ ಮಾಡಿಸಿಕೊಡರು, ಎಂಬ ಹಸಿ ಸತ್ಯ ಅಜ್ಜಿಗೆ ಗೊತ್ತಿತ್ತು. ಸ್ವತಃ ಕನ್ನಡಕವೂ ಇಲ್ಲದೆ ಮಾ|| ಹಿರಣ್ಣಯ್ಯನವರು ಹೇಳುವಂತೆ ಕನಸುಗಳೂ ಕ್ಲೀಯರ್ ಆಗಿ ಕಾಣಿಸವು ಎಂಬ ಥಿಯರಿ ಆಕೆಯದು. ಆಕೆ ತೀರಿಕೊಂಡಾಗ ಬಹುಶಃ ಆಕೆಯೊಡನೆ ಚಿತೆ ಏರಿದ ಕೆಲವೇ ಆಕೆಯ ಮೂಲ ಗುರುತುಗಳಲ್ಲಿ ಕನ್ನಡಕವೂ ಒಂದಿರಬಹುದು.

ನಿಮ್ಮ ಮನೆ ಗೋಡೆಗಳಿಗೆ ನಿಮ್ಮ ಪೂರ್ವಜರ ಹಳೇ ಚಿತ್ರಗಳಿದ್ದರೆ ಗಮನಿಸಿ. ಮೈಸೂರು ಪೇಟ, ಹುರಿ ಮಾಡಿದ ಮೀಸೆ, ಚಿನ್ನದ ಸರದ ಸಮೇತ ಆ ದುಂಡಗಿನ ಗಡಿಯಾರ ಮತ್ತು ವಿವಿಧಾಕಾರದ ಆ ಕನ್ನಡಕಗಳು. ಕನ್ನಡಕವು ಹೊರಗಿನ ಜಗವನ್ನು ಸ್ಪಷ್ಟವಾಗಿ ಕಾಣಿಸಲು ಎಷ್ಟು ಸಹಕಾರಿಯೋ ಹಾಗೆ ನಮ್ಮ ಹೊರ ರೂಪವನ್ನು ತುಸುವಾದರೂ ಸಹ್ಯವಾಗಿ ಕಾಣಿಸಬಲ್ಲ ತಾಕತ್ತು ಅವಕ್ಕೂ ಇದೆ.


ನಮ್ಮ ಮಹಾತ್ಮ ಗಾಂಧಿಯವರ ಅತ್ಯಂತ ಸುಲಭದ ರೇಖಾ ಚಿತ್ರ ಬಿಡಿಸುವಾಗ ನಾವು ಅವರ ಕನ್ನಡದಿಂದಲೇ ಶುರು ಮಾಡುತ್ತೇವೆ ಹೌದೋ ಅಲ್ಲವೋ?

ಹಳೇ ಸಿನಿಮಾಗಳಲ್ಲಿ ನಾಯಕ ನಟರು ಬಳಸುತ್ತಿದ್ದ ಊರಗಲದ ತಂಪು ಕನ್ನಡಕ ಗಮನ ಸೆಳೆಯುತ್ತಿದ್ದವು. ಕೆಲ ರಾಜಕೀಯ ನಾಯಕರನ್ನು ನಾವು ಅವರ ಕನ್ನಡಕವಿಲ್ಲದೆ ಗುರುತೂ ಹಿಡಿಯಲಾರವೇನೋ ಅಲ್ಲವೇ? ಅಂತಹ ಊರಗಲದಿಂದ ಈಗ ಸಾವಿರಗಟ್ಟಲೆ ಬೆಲೆ ಬಾಳುವ ತಂಪು ಕನ್ನಡಕಗಳ ಜಮಾನಾದವರೆಗೂ ಅವು ನಮ್ಮ ಬದುಕಿನ ಅವಿಭಾಜ್ಯ ಅಂಗವೇ. ನಾನು ’ಆ ಕಂಪನಿ’ ತಂಪು ಕನ್ನಡಕ ಧರಿಸಿದ್ದೇನೆ ಎನ್ನುವುದು ಪ್ರತಿಷ್ಠೆಯ ಸೂಚಕವೇ.




ಸಿನಿಮಾಗಳಲ್ಲಿ ಜಿಪುಣ ಪಾತ್ರಗಳನ್ನು ತೋರಿಸುವ ಪರಿಕಲ್ಪನೆ ಗಮನಿಸಿ, ಅವರ ಕನ್ನಡಕದ ಒಂದು ಆಧಾರ ಮುರಿದಿತ್ತೆನ್ನಿ ಅದಕ್ಕೆ ಅವರು ದಾರ ಕಟ್ಟಿಕೊಂಡು ಮೂಗಿನ ಮೇಲೆ ಏರಿಸಿರುತ್ತಾರೆ!

ಇನ್ನೂ ಅಚ್ಚರಿ ಎಂದರೆ ನಮ್ಮ ಅತ್ತೆ ಮತ್ತು ಮಾವನವರದು ಅಪರೂಪದ ಆದರ್ಶ ದಾಂಪತ್ಯ. ಅವರು ಹೇಗೆ  ಒಬ್ಬರನ್ನೊಬ್ಬರು ಬಿಟ್ಟಿರಲಾರೊ ಹಾಗೆಯೇ ಅವರ ಕನ್ನಡಕವೂ ಸಹ. ಒಂದೇ ಕನ್ನಡಕ ಅದು ಹೇಗೋ ಇಬ್ಬರು ಬಳಸಬಹುದಾಗಿದೆ.

ಈಗ ಬಿಡಿ ಚಾಳೀಸುಗಳ ನಿವಾರಣೆಗಾಗಿ ನೇತ್ರ ತಜ್ಞರು ಕೆಲವೇ ನಿಮಿಷಗಳ ಶಸ್ತ್ರ ಚಿಕಿತ್ಸೆ ಮಾಡುತ್ತಾರೆ. ಹುಡುಗ ಹುಡುಗಿಯರು ಕಣ್ಣಿನ ಒಳಗೇ ಲೆನ್ಸ್ ಹಾಕಿಕೊಂಡು ತಮ್ಮ ಐಬು ಜಗದ್ಜಾಹೀರಾಗದ ಹಾಗೇ ಎಚ್ಚರಿಕೆ ವಹಿಸುತ್ತಾರೆ. ವಿದ್ಯಾವಂತರಿಗೆ ತಮ್ಮ ಓದಿನ ಪುಟ್ಟ ಕನ್ನಡಕವನ್ನು ಜೇಬಿನ ಪುಟ್ಟ ಹೋಲ್ಡರಿನಿಂದ ತೆಗೆದು ಹಾಕಿಕೊಳ್ಳುವುದೇ ಒಂದು ಗರ್ವ ಸೂಚಕವೇ. 

ಈ ಮಸೂರಗಳು ಕನ್ನಡಕಕ್ಕೆ ಹೇಗೋ ಹಾಗೆ ಬದುಕಿನ ಹಲವು ಉಪಕರಣಗಳಿಗೆ ಮೂಲ. ಕ್ಯಾಮರಾ, ಪ್ರೊಜೆಕ್ಟರ್, ಸೂಕ್ಷ್ಮ ದರ್ಶಕ, ಉದರ ದರ್ಶಕ ಶಸ್ತ್ರ ಚಿಕಿತ್ಸಾ ಸಾಧನ ಹೀಗೆ ಇವುಗಳ ಬಳಕೆ ವಿಶ್ವ ವ್ಯಾಪಿ. 



ಚಿಕ್ಕವನಾಗಿದ್ದಾಗ ಬರ್ನ್ ಆದ ಬಲ್ಪುಗಳ ತಲೆ ಬುರುಡೆ ಒಡೆದು, ಖಾಲೀ ಪೆಟ್ಟಿಗೆಯ ಒಳಗಡೆ ಅದನ್ನು ಜೋಡಿಸಿ ಬಲ್ಪಿನ ಒಳಗಡೆ ನೀರು ತುಂಬಿಟ್ಟು ಸಿನಿಮಾ ಪ್ರೊಜೆಕ್ಟರ್ ಅಂತ ತಯಾರು ಮಾಡುತ್ತಿದ್ದೆ. ಆ ನೀರು ತುಂಬಿದ ಬಲ್ಬೇ ಮಸೂರದ ಹಾಗೆ ಕೆಲಸ ಮಾಡುತ್ತಿತ್ತು. ಕಿಟಕಿಯ ತೂತಿನಿಂದ ಕನ್ನಡಿ ಮುಖೇನ ಹಾಯಿಸಿದ ಸೂರ್ಯನ ಬೆಳಕಲ್ಲಿ,  ಮೂಡುತ್ತಿದ್ದ  ಸಿನಿಮಾ ರೀಲಿನ ಒಂದೊಂದೇ ಫ್ರೇಮು ಅಮಿತಾನಂದವನ್ನು ಕೊಡುತ್ತಿತ್ತು. ಏನೋ ಕಂಡು ಹಿಡಿದ ಸಂಭ್ರಮ ನನಗೆ. ನೀರು ತುಂಬಿದ ಬಲ್ಬೂ ಮಸೂರದ ಕೆಲಸ ಮಾಡುತ್ತಿತ್ತು.

ಅಂದ ಹಾಗೆ ಈ ಲೇಖನವನ್ನು ಬೆರಳಚ್ಚಿಸುವಾಗಲೂ ನಾನು ಕನ್ನಡಕ ಹಾಕಿಕೊಂಡೇ ಕುಳಿತಿದ್ದೇನೆ ಎಂದರೆ, ಇದರ ಅನಿವಾರ್ಯತೆ ನಿಮಗೆ ಅರಿವಾಗಿರಬಹುದಲ್ಲವೇ?


ಗಲ್ಫ ಕನ್ನಡಿಗ ಈ ಪತ್ರಿಕೆಯಲ್ಲಿ ಪ್ರಕಟಿತ.
21.12.2012

http://gulfkannadiga.com/news/culture/29066.html

(ಚಿತ್ರ ಕೃಪೆ : ಅಂತರ್ಜಾಲ)

10 comments:

  1. ಓ ಕರುನಾಡ ಕನ್ನಡಿಗ ನಿಮಗೆ "ಕನ್ನಡಕವೇ ಭೂಷಣ !! ನಿಮ್ಮ ಬರವಣಿಗೆಯ ಆಯ್ಕೆಯ ವಿಷಯಗಳು ತುಂಬಾ ಚನ್ನಾಗಿರುತ್ತವೆ ವಂದನೆಗಳು

    ReplyDelete
  2. ಬದರಿನಾಥರೆ,
    ನಾನೂ ಸಹ ಕನ್ನಡಕವನ್ನು ಧರಿಸಿಕೊಂಡೇ ನಿಮ್ಮ ಲೇಖನವನ್ನು ಓದಿ ಆನಂದಿಸಿದೆ. ಕವನಗಳಷ್ಟೇ ಚೆನ್ನಾಗಿ ಲಲಿತ ಪ್ರಬಂಧಗಳನ್ನೂ ಸಹ ನೀವು ಬರೆಯಬಲ್ಲಿರಿ ಎನ್ನುವುದು ಹೆಮ್ಮೆಯ ಸಂಗತಿ.

    ReplyDelete
  3. ನಿಮ್ಮ ಕವಿತಗಳಷ್ಟೇ ಲೇಖನಗಳನ್ನೂ ನಾವು ಇಷ್ಟ ಪಡುತ್ತೇವೆ ಬದರಿ ಸರ್..
    ಚಂದ ಬರೆದ್ರಿ ಕನ್ನಡಕದ ಕತೆಯನ್ನು... :) :)

    ReplyDelete
  4. ಎಲ್ಲೆಲ್ಲೂ ಪ್ರಳಯದ ಬಗ್ಗೆ ಚರ್ಚೆ ಆಗ್ತಿದ್ರೆ ನೀವು ಸುಲೋಚನ ಹಿಂದೆ ಬಿದ್ದಿರಿ , ಸುಲೋಚನ ವಿಶ್ವರೂಪ ದರ್ಶನ ಆಯ್ತು, "ಇಂದು ಖರೀದಿಸಲು ಸುಲೋಚನ ತೆತ್ತ ಬೇಕು ಅಧಿಕ ಹಣ" ಹೌದೂ ಒಳ್ಳೆಯ ವಿಚಾರದ ಮಂಥನ ನಡೆಸಿದ್ದೀರ ಬದರಿ ಸಾರ್, ನಿಮ್ಮನ್ನು ಹೊಗಳಲು ನನ್ನಲ್ಲಿದ್ದ ಪದಗಳು ಎಲ್ಲಾ ಖಾಲಿಯಾಗಿವೆ. ಅದಕ್ಕೆ ಪ್ರೀತಿಯಿಂದ ಒಂದು ಸಲಾಂ ಹಾಕುತ್ತೇನೆ.ಗುಡ್ ಗುಡ್ ಗುಡ್ ಬದರಿ ಸಾರ್.

    ReplyDelete
  5. ಚೆನ್ನಾಗಿದೆ ಹೇಳಬೇಕಾದ ಎಲ್ಲ ಮಾತುಗಳನ್ನೂ
    ಮೇಲಿನ ಹಿರಿಯರು ಹೇಳಿದ್ದಾರೆ :)

    ReplyDelete
  6. ಬದರೀ ಸರ್.....

    ನಿಮ್ಮ ಕವನಗಳ ಬಹು ಹಳೆಯ ಅಭಿಮಾನಿ ನಾನು,...ಈಗ ನಿಮ್ಮ ಲೇಖನಗಳು ಮನಸ್ಸಿಗೆ ಮುದ ನೀಡುತ್ತಿವೆ....ಪ್ರತಿ ಸಲ ಏನೆಂದು ಪ್ರತಿಕ್ರೀಯಿಸೋದು ಸರ್? ಶಬ್ಧಗಳ ಕೊರತೆ ಇದೆ ನೋಡಿ ನಮ್ಮಲ್ಲಿ.....

    ಹಾಗೆ ನಾವು ಕನ್ನಡಕ ಹಾಕಿನೆ ಓದೋದು ನಿಮ್ಮ ಬರಹಗಳನ್ನು....ಕನ್ನಡಕ ಮಂಥನ ಚೆನ್ನಾಗಿದೆ ಸರ್...ಧನ್ಯವಾದಗಳು ಒಂದು ಸುಂದರ ಬರಹ ಕೊಟ್ಟಿದ್ದಕ್ಕೆ....

    ReplyDelete
  7. ಸುಂದರ ಬರಹ, ವಿಷಯ ಮಂಡನೆ. ಬಹಳ ಚೆನ್ನಾಗಿ ಎಲ್ಲ ಆಯಾಮಗಳನ್ನೂ ಸೇರಿಸಿಕೊಂಡು ಬರೆದಿದ್ದೀರಿ. ನಮ್ಮ ಲೋಚನಗಳಿಗೆ "ಸು" ಆದ ಬರಹ.

    ReplyDelete
  8. ರಾಜ ಸುಲೋಚನದ ಬಗ್ಗೆ ಸುಂದರ ಲೇಖನ ಬದರಿ ಸರ್..ಕನ್ನಡಕಗಳು ಅನೇಕರ ಬಾಳಿನಲ್ಲೂ ಹಾಗೆ ಬಂದು ನಿಂತು ತನ್ನ ಅಧಿಕಾರವಾಣಿಯನ್ನು ಸ್ಥಾಪಿಸುವ ಜೊತೆಗಾರ..ಕಣ್ಣು ದೃಷ್ಟಿ ಸರಿಯಾಗಿದ್ದವ್ರು ಕೂಡ ಒಮ್ಮೆಯಾದರೂ ಸುಲೋಚನಳಿಗೆ ಒಡೆಯನಾದಾಗ ಹೇಗೆ ಕಾಣುತ್ತೇವೆ ಎನ್ನುವ ಚಪಲ ಇದ್ದೆ ಇರುತ್ತದೆ..ಸಿನೆಮಾಗಳಲ್ಲಿ ಕನ್ನಡಕದ ಒಂದು ಮನೋಜ್ಞ ದೃಶ್ಯ ಎಂದರೆ ಪಂತಲುರವರ "ಸ್ಕೂಲ್ ಮಾಸ್ಟರ್" ಜೀವನದಲ್ಲಿ ಒಮ್ಮೆಯಾದರೂ ಆ ಚಿತ್ರವನ್ನು ನೋಡಲೇಬೇಕು...ಸುಂದರ ಲೇಖನ .ನಿಮ್ಮ ಬಾಲ್ಯದ ಆ ಉತ್ಸಾಹದ ಪ್ರತೀಕವೇ ಇಂದು ಸುಮಧುರ ಸಂಗತಿಗಳನ್ನು ಸೆರೆಹಿಡಿಯಬಲ್ಲ ಕವಿಯಾಗಿರುವುದು..ಕಾರಣ...ನಿಮಗೆ ಪ್ರತಿಯೊಂದು ವಸ್ತುವು ನಿಚ್ಚಳವಾಗಿ ಕಾಣುವುದೇ ಅಲ್ಲವೇ...

    ReplyDelete
  9. ಭಿನ್ನ ವಿಚಾರಗಳ ಕುರಿತು ಕವನ ಬರೆಯೋ ನಿಮ್ಮ ಕೈ ಸಿದ್ಧಿ.. ಭಿನ್ನ ವಿಚಾರಗಳ ಕುರಿತಾದ ಲೇಖನಗಳಿಗೂ ಪಳಗಿದೆ ಅನ್ನೋಕೆ ಈ ಲೇಖನವೂ ಒಂದು ಸಾಕ್ಷಿ,,


    ಕನ್ನಡಕ ಕೇವಲ ಉಪಕರಣ ಅಲ್ಲ ಅದೊಂದು ಉಪ-ನಯನ.. ಅದಿಲ್ಲದೆ ಅದೆಷ್ಟೋ ಜನರ ನೋಟ ಅರೆ ಕುರುಡೇ..


    ಭೂತ ಕನ್ನಡಿಗಳ ವಿವಿಧ ರೀತಿಯ ಉಪಯೋಗಾಲ ಕುರಿತಾದ ನಿಮ್ಮ ಭಾವ & ಮೆಲುಕುಗಳನ್ನ ಬಹಳ ಸುಂದರವಾಗಿ ನಿರೂಪಿಸಿದ್ದೀರಿ..


    ಇಷ್ಟ ಆಯ್ತು ಸಾರ್.. :) :)

    ReplyDelete