ಧಾಮದ ಹಂಗು...

ಬರುವಾಗಲೂ ಗೀಚಲಿಲ್ಲ ಕಾಗದ ಪತ್ರ
ತಂತಿ ಸಂದೇಶದ ರಗಳೆಗಳಿಲ್ಲ;
ಹೇಳಿ ಕೇಳಿ,
ಇದು ಖಂಡಾಂತರ ಹಾರು ಹಕ್ಕಿ...

ದಿಕ್ಕು ತಪ್ಪದ ತಲಮಾರು ಪಯಣ
ಪುಟ್ಟ ಮೆದುಳೆ ಅದರ ದಿಕ್ಸೂಚಿ
ಧಾಮಕ್ಕಿಳಿವ ಕರಾರುವಾಕು ಪ್ರಜ್ಞೆ,
ಅದಕೇಕೆ ಮರುಳುವಾಗಲೂ ಕೈ ಬೀಸೋ
ವಾಂಛೆ ಅಂಟು ಚಪಲ ಇನ್ನಿತರೇ?

ಯಾವ ರೆಡಾರು ತುಪಾಕಿಗೂ ಬೆದರ
ಗಡಿ ಭಾಷೆ ವೀಸಾ ಬೇಲಿ ಇವಕಿಲ್ಲ
ಇಳಿವ ಸುಂಕ, ಸ್ಥಳೀಯ ತೆರಿಗೆ ಸುಲಿಗೆ
ಮುಂಗಡ ಕಾಯ್ದಿರಿಸೋ ಪೊಗರು ತನದಲ್ಲ
ಯಾರ ಅನುಮತಿಗೂ ಕಾಯ,
ಹಾರುವುದಷ್ಟೇ ಕಾಯ...

ಪಕ್ಷಿಧಾಮದ ತುಂಬ ನೆಂಟರ ಕಲರವ
ಇಳಿದಲ್ಲೇ ಸಾರ್ವತ್ರಿಕ ಮಿಲನೋತ್ಸವ
ಸೂಲಗಿತ್ತಿಯು ನಾಸ್ತಿ
("ಸುಖಃ ಪ್ರಸವವೇ ಜಾಸ್ತಿ")
ಗೂಡು ಗೂಡಲ್ಲೂ ತತ್ತಿಯಿಂದ ಮರಿ...
ಗುಕ್ಕು ಕದಿಯುವರಿಲ್ಲ, ಅದರೂಟ ಇದಕೊಲ್ಲ
ಖುರ್ಚಿ ಎದ್ದೊಡೆ, ಕಾದು ಅಂಡೂರಲಿಲ್ಲ!

ಗುತ್ತಿಗೆ ಅವಧಿ ಮುಗಿದ ಕರಾರು...
ಮರಿ ಹಕ್ಕಿ ರೆಕ್ಕೆ ಬಲಿತರೆ
ಹಿಂಡು ವಾಪಸಾತಿಗೆ ತಯಾರು,
ಹೊರಡುವಾಗಲದು ತೀರಾ ನಮ್ಮಂತೆ
ತೆಗೆದಾವೇ ಮಾಲಿಕನ ಮುಂದೆ ತಕರಾರು?

ಅದೂ ನಿಜ ಬಿಡಿ,
ಹಕ್ಕಿಗೆಂಥಾ
ನೆಲದ ಹಂಗು?

(ಚಿತ್ರ ಕೃಪೆ : ಅಂತರ್ಜಾಲ)