ಪುಷ್ಪ ವೃತ್ತಾಂತ...

ತೋಟಗಳೊಡಲಲಿ ಅರಳು
ಸುಮಗಳ ಕೀಳು ಮುತವರ್ಜಿ
ಹಸಿ ದಾರದಿ ಹೊಸೆವ ಕೈಗಳದೂ,
ಬುಟ್ಟಿ ಹೊತ್ತವರದದೇ ಹಸಿವು

ದಾಸವಾಳಕೆ ತಾಯಿ ಹೃದಯ
ಸಂಪಿಗೆಯು ನಲ್ಲೆ ಎಟುಕದೆತ್ತರ,
ವಚನಕದೇ ರೋಜಾ ಪಚನಕೂ
ಸೂತಕಕದು ಕಡುಗಪ್ಪು ಸೂಚಕ

ವರಕೊದಗು ಕಳೇವರಕೆ ಕೌದಿ
ಅಪಾತ್ರನ ಕೊಬ್ಬಿದ ಕೊರಳಿಗೆ
ಮೊಳಕಾಲೂರಿದ ಬಿನ್ನಹಕೆ ಗುಚ್ಛ
ಸಲ್ಲು ವಿಳಾಸವೇ ಹಣೆಯ ಬರಹ!

ಕೊಂಡು ಸುರಿಸಿಕೊಂಡ ವೃಷ್ಟಿ
ಪೃಷ್ಠ ಬುಡಕವೇ ಮೆತ್ತೆ ಮೆತ್ತೆ
ನಲುಗು ಪಕಳೆಗಳು ಪಾದದಡಿ
ಪಲ್ಲಕಿ ಸೇವೆಗದು ಪಲ್ಲಂಗಕೂ

ಮಲ್ಲಿಗೆಯು ಚಂಡು ಸೇವಂತಿಗೆ
ಸುಗಂಧರಾಜ ಕನಕಾಂಬರಿ ಇತರೇ
ವಿಗ್ರಹದ ಮುಡಿಗೇರಿ ಮರುದಿನಕೆ
ನಿರ್ಮಾಲ್ಯವದೂ ನಮ್ಮ ನಿಮ್ಮಂತೆ

(ಚಿತ್ರ ಕೃಪೆ: ಅಂತರ್ಜಾಲ)